PAG-AMPO ALANG SA PINILIAY SA 2010

oceseMakagagahum ug mahigugma-ong Dios,   pinaagi sa grasya ni kristo Imong Anak, nabunyagan kami ug nahimong mga sakop sa simbahan. Tungod niining imong grasya nakaambit kami sa imong kaugalingong kinabuhi sa gugma, nahimo kaming imong mga anak nga sinagop, ug makatawag kami kanimo nga among Amahan Sumala sa gitudlo kanamo ni Jesus.

Busa Ginoo ug Amahan namong tanan, kini mao ang kahulugan alang kanamo sa pagkatawhanon, pagkakristyano ug pagkakatoliko. usa ka kasugoan nga tumanon ug buluhaton nga himoon. Mao nga malipayon, mapasalamaton, ug malaumon kami.

Ginoo, tungod niining paglaum, gitan-aw namo ang umaabot nga lokal ug nasyonal nga piniliay isip usa ka bag-ong higayon sa pagtuman sa imong kasugoan ug paghimo sa buluhaton sa paghigugma sa tanan namong mga kaigsoonan, bisan mga dili Kristyano ug dili Katoliko. Kay sila usab imong mga anak.

Apan Ginoo, nagadala usab ang maong prosesong elektoral ug mga kakuyaw ug hulga sa kasugoan sa gugma ug sa buluhaton nga gihatag sa Dios.  Ginoo, daghan na ang nag-antus ug nangamatay sa among kaigsoonan – mga dili Kristyano ug dili Katoliko – gituis ug gidaut kining maong gugma pinaagi sa pagdumot ug kahakog sa bahandi ug sa kaibog sa gahum ug kabantogan.

Tungod niini, Langitnong Amahan, modangop na usab kami kanimo aron magpakitabang. Diha sa pagluhod nga mapaubsanon, mangayo kami Kanimo nga panalanginan mo kami ug pukawon mo dinhi kanamo ang grasya sa among bunyag ug ang gahum sa paghigugma ug pag- alagad nga mapaubsanon ug matinud-anon alang sa kaayohan sa tanan  ug sa walay pagsapayan sa bisan unsay among dangatan. Kini ug kini lamang unta ang among katarungan isip mga aktibong lumulupyo ug Kristyanos sa pag-apil sa umaabot nga prosesong elektoral.

Nangayo kami niining grasya, O Ginoo, alang kanamong tanan nga mga opisyales sa gobyerno, mga commissioners ug mga empleyado sa COMELEC, mga militar ug mga pulis, mga kandidato ug mga dumadapig sa mga politikanhong pundok, mga rehistrado nga botante, mga inila nga citizens’ arm sa COMELEC, ug mga Pilipino.

Ginoo, diha sa imong grasya, mohangyo kami nga itanum mo dinhi kanamo ang usa ka nabag-ong pagtuo sa among pagkatawhanon ug sa among pagka-Pilipino. Apan ilabina, O Ginoo, bag-oha dinhi kanamo ang grasya sa bunyag nga makabuhat og hustisya ug ang pagtuo nga makamugna ug kahiusahan taliwala sa mga kalainan. kay, nahisakop kaming tanan sa mga nagkadaiyang grupong sosyal, mga grupong politikanhon, o mga independyente.

Ang among Kristohanong pagtuo ug ang kaayohan sa tanan nga mga Pilipino bisan lain-lain og relihiyon mao unta ang molabaw nga hikut nga mabugkos ug magdasig Kanamo sa umaabot nga piniliay. Kay kon dili, dinasig sa kaugalingong mga interes, biay-biayon lang namo ang among dignidad isip mga tawo ug mga magtutuo, bugal-bugalan lang namo ang among kaugalingon isip mga Kristyano ug mga Katoliko, ug dauton lang namo ang gihatag mong tawhanong katungod isip imong mga  anak nga sinagop.

Sa katapusan, maloloy-on namong Amahan ug Ginoo, nangamuyo kami kanimo nga pasayloon mo kami sa among karaan ug bag-o nga kinaiya nga dili mahigugmaon alang sa usag-usa. Hatagi kami sa grasya sa pagkamapaubsanon aron makapasaylo kami sa uban. Hatagi kami sa kalig-on sa pagbasol sa among mga sala, sa pag-ayo sa among gidaut, ug sa pag-uli sa mga butang nga among gikuha sa paagi nga ilegal. Nahibalo kami nga ang among mga sala ug mga kalapasan, bisan pa sa kadaghan ug kadautan niini, dili gayud makatupong sa imong walay kinutubang kaluoy ug walay katapusang pagpasaylo.

Ang imong grasya makahimo kanamo sa pagsugod pag-usab tungod kay dinhi kanamo gitanum mo ang kaayo nga dili gayud mawagtang bisan pa sa among paglaum ug pag-ampo, O Ginoo.

Kining tanan among gipangayo diha sa imong kaluoy ug gugma sa ngalan ni Jesu Cristo among Ginoo pinaagi sa mga pag-ampo sa Mahal nga Birhen Maria, Iyang inahan ug inahan namo, Ikaw nga uban kang Cristo ug sa Esperitu Santo, Dios nga usa hangtud sa kahangturan. AMEN